Dr Boodesuuri
Värs
Fasnacht 2017
Der Christoph isch uff d Schnuure gflooge
Und het derbi si Zingge verbooge
Doch wär iin kennt,weiss au bim Stolpere
Duet är wyterhyypoltere
So fluecht är denn grad nach em Lande
„Welle Schafseckel,isch mir uf mini Burka gstande!“
*************************************************************************************
D Brite saage der EU tschau!
Was vo Brüssel kääm, das syg nimm schlau!
Dä Brexit, wo die Brite baue,
Duet au em Köppel d Politigg versaue.
Mym Maage macht die EU gar kai Fraid,
Ych ha der Brüsseler-Salaat no nie verdrait!
*************************************************************************************
E Bryyse Salz hilft bim Rootwyyflägg!
Bim Kessler duet der Morin syy Zwägg!
D BaZ - es schläggts kai Gaiss ewägg,
het im Katzekischtli iire Zwägg.
Mit däm BVB-Millione-Bestächigs-Drägg
goot hoffetlig dä Wessels äntlig wägg!
*************************************************************************************
In Basel gits e Nootschloof-Stell.
Das waiss jeede arme Basler-Gsell.
Nit fir alli wott me Better aane stelle,
Nit de Rumäne und nit de Landschäftlergselle.
Fir d Sabine Pegoraro isch das kai Katastroofe,
Denn si duet zLieschtel im Landroot schloofe!
*************************************************************************************
Ass me d Fuessball-WeeM wett belääbe
Mit Zuesatz-Teams, find ych nit dernääbe!
So kenne sich ganz ohni scheniere
Au glaini Länder wie Holland qualifiziere.
Doch ebbis haut mi ganz uus de Sogge,
Jetzt wott me fir d Zircher d Superlyyg uffstogge!
**************************************************************************************
Ass es z Basel vier Blaggedde git,
Find ych als Boodesuuri ächt der Hit!
Esoo liggt d Wohret klar uff em Disch,
Ass e Schnitzelbangg d Kreenig vo der Fasnacht isch.
Dorum bin ych jo au uff däm Bijou druff
Wääge mir sprängts do rächts der Rahme uff
*************************************************************************************
My Frind Franziskus, dää vo Rom,
verzwyyflet schyyr im Petersdom,
Är schrybt mer e Brief - ganz sorgevoll,
Eb ych en Idee haig, fir was är bätte soll.
Ych schryb em zrugg s liggt uff der Hand
Und winsch der Wessels ins Pfäfferland.
*************************************************************************************
Jetzt gits denn, will das d Bonze welle,
So Inseggte-Häppli statt Friggadelle!
Das Insekte-Mampfe isch der Waahn!
populäär vo Asie bis zem Vatikaan.
Doch ebbis gits, wo sicher isch
E Schwoobekääfer kunnt mir nid an Disch!
*************************************************************************************
Mii het letscht Summer s Fieber paggt,
Und ych ha vo deene komische Pokémons gjaggt.
Ych ha dänggt bim Ummerenne,
kennt ych s Fett vo myner Sänggbruscht verbrenne.
So han ych denn am Märtplatz unde
E siesses roothoorigs Pikachu gfunde.
Doch es segglet dervoo, es isch zem Gruuse.
Vom Noochehetze hänggt mer d Zunge uuse.
Und ändlig, won is gha hätt - noohn e paar Stunde
Isch das Eva Herzog am Fischmärt verschwunde!
Fasnacht 2016
Jeede Daag liisisch e neue Schliessigsbricht
au s Fasnachtscomité sait:“Mir mache dicht!“
Nid nur im Stüggi mache d Lääde zue
au in der Innerstadt herrscht Graabesrueh
Die Stilli het my so stargg beruhigt bim Autifahre
ass ych sone Poller grammt ha mit mym Kaare.
*************************************
Die Flichtlingswälle macht kaim Schwoob me Spass
obwohl d Angie sait:“Wir schaffen das!“
s macht sogar scho d Guetmensche muff
denn d Mutti nimmt wirgglig alles uff
wenn das so wytergoht, find ych s Digge
kenne mir de Schwoobe d Zircher schigge
*************************************
Au in däm Joor bättet my Frind Franziskus z Rom
jeede Daag fir sWohl vo der Wält im Petersdom:
mues dä Arm doch in siine alte Daage
e Huffe Sinde vo sim Personal ertraage
jetzt het är sogar äxtra Feerie gnoh
he der Blatter wott zem Byychte koo
*************************************
Lut de Landschäftler iire Buureuussaage
Mues der Rootstab das Joor am Hungerduech naage
Mir Bebbi lyyde Höllequaale
dermit d Herzog die 20 Millioone ka zaale
Derbyy kennt me dää Klotz doch investiere
zem ändlig die neu Nationalreetin integriere.
*************************************
Au d Aisha Buski-Ibrahini vo der Fäldbärgstrooss
findet die Wahle vom letschte Herbscht famoos
Nid nur dr katoolisch Lehmaa duet vom Stiehli falle
nai au der waarmi Stolz duet me uusem Bundeshuus knalle
derfir derf jetzt der Eymaa z Bäärn de Fraue noochlaufe
und in nüün Monet denn wider e neu Buschi lo daufe.
*************************************
Nohdäm bim SRF s Gäld duet schwinde
derfe der Müller und Giacobbo Iiren Abgang verkinde
Im Jänner duets denn au der Blocher raffe
losst sich und der Toni Brunner uusschaffe
Jetzt bräächt no ebbis myy Härz zem Lache
wenn nohn em Morin der Wessels sglyych au wurd mache.
*************************************
Jetzt mien Diir alli s Fuudi lüpfe
Dernoo en Armlängi wägg vo Eurem Noochber hüpfe
Jetzt sin alli Fraue in Sicherheit
E Minischtere uus em Schwoobeland het das gsait!
Ych dr Boodesuuri wär scho froh
ych wurd bi nere Frau, scho numme uffekoo
*************************************
Duesch z Ziiri im Boor o Lagg logiere
derfsch als Funggtionäär diräggt in d Kischte spaziere
Au für dr Platini duets un petit peu anderscht loife
und der Blatter sait nur „ E Wörld gupp kaasch nid choife!“
Nohdäm Rundschauufftritt hets jeede kapiert
das Pflaschter isch an der lätze Stell blatziert!
*************************************
S Doris Leuthard losst vyyl Gäld lo springe
zem die schyss Billagstyyre duurezbringe.
Mit dääne wärde mir im Jänner quäält
wo me der „ Schweizer des Jahres“ wählt
der Polo Hofer als Gwinner sait“Auem aa,
muesch für die Uuszeychnig kiffe und e starche Finger ha!“
*************************************
Obwool letscht Summer d Sunne vom Himmel brennt,
bin ych mit mym Glaine an dPremieere vo dääne Minions grennt
Nohn em Film find ych s nimme zem Lache
will doch myy Sohn mit soome Zwuggel e Selfie mache.
Das Maskottli duet so heftig d Stirne runzle
ass ych hinder siim Rugge numme kha schmunzle.
Das Männli duet sich nämmlig heftig dra steere
und fangt sich mit Händ und Fiess a wehre.
Es schreyt derbyy immer wider“Ych kha nyt derfiir!
Ych bi nid e Minion, ych by der Baschi Dürr!“